يا مركب العمر

يا مركب العمر يا مشبوح ما بين هلبين
تنشد بينهم

تعيش فى الشك ما بين بين
تنفك منهم

تتوه مندوه فى بحر البين
ولفين نروح
ياريت كان لي ياهوه قلبين

متقولش أصلك وفصلك
قول حليم ستار
حتغمى بأيديك عينيك
تعمى الخطى وتحتار
عقلك فى راسك وملزوم كل يوم تختار
عيش فى الحقيقة ليندار نصلها البتار
وتحشك النار
وتتسوى على الجنبين

مين وابن مين
الحياة ميهمهاش أصلك
أصلك بفعلك
تواصل فعله ويواصلك
فعلك ده من عقلك
إن طاوعته رقصلك
زمنك ودنياك
وإذا قصقصته نغصلك
زمنك ودنياك
ف شوف وأختار ما بين دربين

يا مركب العمر يا مشبوح ما بين هلبين
تنشد بينهم تعيش فى الشك ما بين بين
تنفك منهم تتوه مندوه فى بحر البين
ولفين نروح
ياريت كان لي ياهوه قلبين



مقدمة مسلسل المرسى والبحار
كلمات : سيد حجاب
غناء : محمد الحلو